Strateġija għan-Nies u Proġetti

Il-missjoni tad-Direttorat dwar Strateġija għan-Nies u Proġetti hija li jiżgura li dawk li jaħdmu fi ħdan l-Amministrazzjoni Pubblika jistgħu jsibu sapport f’forom varji tul il-karrieri tagħhom, f’varjetà ta’ dixxiplini inklużi s-saħħa mentali, il-kundizzjonijiet tal-impjieg u d-dinamika fuq ix-xogħol, kif ukoll gwida dwar il-karriera.

Is-Servizz Pubbliku jagħraf li l-impjegati tiegħu huma riżorsa importanti ħafna u għandu l-mira li jipprovdi s-sapport meħtieġ bl-objettiv li jissaħħu l-effettività u l-effiċjenza tagħhom fuq il-post tax-xogħol tagħhom u li l-benesseri tagħhom jiġi ssapportjat.

Is-servizzi offruti mid-Direttorat dwar Strateġija għan-Nies u Proġetti huma maqsuma primarjament fi tliet units:

L-Employee Support Programme

L-Employee Support Programme (ESP) jipprovdi firxa wiesgħa ta’ servizzi ta’ sapport kunfidenzjali u mingħajr ħlas għall-impjegati pubbliċi, imfasslin biex jgħinuhom ikampaw bid-diffikultajiet tax-xogħol u tal-ħajja tagħhom, li jistgħu jaffettwaw il-prestazzjoni tax-xogħol u l-kwalità tal-ħajja tagħhom jekk ma jagħtux kashom. Minbarra li joffri għajnuna professjonali fuq bażi individwali, l-Employee Support Programme b'mod regolari jorganizza inizjattivi bħal sessjonijiet ta’ taħriġ, konferenzi u seminars. Il-Unit hija wkoll f’kuntatt kontinwu ma’ dawk f’pożizzjonijiet maniġerjali biex jiġu identifikati u ssapportjati l-impjegati b’diffikultajiet. Dan jinkludi li jimmaniġġjaw impjegati li juru nuqqas ta’ effiċjenza u motivazzjoni, li juru problemi bl-imġiba, li għandhom kwistjonijiet ta’ abbuż ta’ sustanzi/droga, jew li qed jirritornaw lura għax-xogħol wara mard fit-tul.

ARA L-POLITIKA KOMPLUTA LI TISTA’ TINSTAB FIT-TAQSIMA 1.9 TAL-MANWAL DWAR IL-MIŻURI TA’ BILANĊ BEJN IX-XOGĦOL U L-ĦAJJA

People360

L-għan tal-People360 Unit huwa li toħloq servizz pubbliku ċċentrat fuq l-impjegati li huwa risponsiv għall-ħtiġijiet taċ-ċittadini u n-negozji. Din l-inizjattiva ilha għaddejja mill-2019 u qiegħda tespandi kontinwament biex tinkludi ministeri addizzjonali.

People360 tieħu approċċ dinamiku u innovattiv – maniġer ta’ People360 jistieden lill-impjegat għal laqgħa individwali kunfidenzjali. Il-laqgħa tista’ ssir b’mod virtwali jew wiċċ imb wiċċ, għalkemm din tal-aħħar hija dejjem mħeġġa aktar għal approċċ aktar personali. IWara l-laqgħa inizjali jsiru laqgħat oħra b'mod regolari. L-uffiċjali pubbliċi jistgħu jitolbu wkoll laqgħat personali jew żjarat fuq il-post biex jindirizzaw mistoqsijiet kollettivi.

L-objettivi ewlenin jinkludu:

Is-semplifikazzjoni ta’ proċessi tar-Riżorsi Umani (HR) biex ikunu aktar effiċjenti u effettivi. Din tinkludi s-semplifikazzjoni tal-proċeduri tar-reklutaġġ u inkarigi amministrattivi jiġu awtomatizzati;
It-titjib tal-involviment u s-sodisfazzjon tal-impjegati billi jittejbu l-kanali tal-komunikazzjoni, jiġi promoss il-bilanċ bejn ix-xogħol u l-ħajja privata, u jiġu pprovduti opportunitajiet għall-iżvilupp professjonali;
Li tiġi żgurata l-konformità mar-regolamenti għat-tmexxija tan-nies inklużi sessjonijiet ta’ għarfien u gwida;
L-iżvilupp ta’ kultura bbażata fuq il-prestazzjoni billi l-impjegati u l-maniġment jiġu ggwidati dwar kif jistabbilixxu aspettattivi ċari tal-prestazzjoni, jipprovdu feedback u rikonoxximent, u jippromwovu kultura ta’ tagħlim kontinwu.

Għal aktar tagħrif jew biex tikkuntattja lill-Unità People360, ibgħat imejl fuq: [email protected]