Ir-Regolamenti tal-Proċedura ta’ Dixxiplina tal-Kummissjoni dwar is-Servizz Pubbliku, 2023, li daħlu fis-seħħ fl-1 ta’ Ottubru 2023, filwaqt li jżommu d-delega ta’ awtorità li bħalissa tista’ tiġi eżerċitata mill-Kapijiet tad-Dipartiment, jiffokaw fuq is-simplifikazzjoni ta' kif tiġi eżerċitata d-dixxiplina billi tiġi delegata aktar is-setgħa, u jitneħħew proċessi mhux neċessarji jew duplikati. Ir-regolamenti l-ġodda jenfasizzaw ukoll it-trasparenza u l-ekwità waqt il-proċeduri dixxiplinari. Il-miżuri l-aktar sinifikanti f’dan il-qasam huma, fost oħrajn, l-introduzzjoni ta’ perjodi ta’ skadenzi ġodda għall-Kapijiet tad-Dipartiment biex jieħdu azzjoni sabiex jiġi limitat it-tul ta’ żmien meħtieġ biex jiġi konkluż każ ta’ dixxiplina; u l-possibbiltà biex l-uffiċjal akkużat jissottometti appell jew rappreżentazzjoni fl-istadji kollha tal-proċess dixxiplinari.
Fid-dawl tal-impenn tal-Gvern biex il-proċessi jiġu ssimplifikati, inħoloq manwal biex jgħin lill-Kapijiet tad-Dipartimenti, il-Maniġers tar-Riżorsi Umani u l-uffiċjali pubbliċi, fl-ipproċessar tal-każijiet ta’ dixxiplina fid-Dipartimenti. Il-manwal, li nħareġ bis-saħħa tad-Direttiva 11, għandu l-għan li jgħin lil dawn l-uffiċjali fil-kompitu tagħhom li jimmaniġġjaw każijiet dixxiplinari, sew jekk jirriżultaw minn każ dixxiplinari jew kriminali, skont ir-Regolamenti tal-Proċedura ta’ Dixxiplina tal-Kummissjoni dwar is-Servizz Pubbliku, 2023.
Id-Direttorat għar-Relazzjonijiet man-Nies iservi bħala l-punt ta’ referenza biex jiggwida u jassisti lid-dipartimenti rigward kwistjonijiet relatati mad-dixxiplina, u jeżerċita rwol ta’ sorveljanza biex jiżgura l-konformità fil-Ministeri kollha.
.png)