Mistoqsijiet Komuni (FAQs)

Għaliex Programm ta' Ġestjoni tal-Prestazzjoni?

Servizz Pubbliku modern ma jistax jgħaddi mingħajr programm effettiv u kontinwu għall-ġestjoni tal-prestazzjoni. Il-Programm ta' Ġestjoni tal-Prestazzjoni (PMP) huwa proċess sinifikanti ta' valutazzjoni tal-prestazzjoni li jikkontribwixxi għal servizz pubbliku aħjar u motivazzjoni mtejba tal-impjegati.

X'inhuma l-aktar riżultati importanti tal-Programm ta' Ġestjoni tal-Prestazzjoni?
Il-Programm ta' Ġestjoni tal-Prestazzjoni huwa għodda ta' ġestjoni effettiva li tipprovdi:

• L-impjegat b'feedback regolari dwar il-prestazzjoni tax-xogħol tiegħu;
• L-Organizzazzjoni b'rekord strutturat tal-prestazzjoni tal-impjegati;
• Bażi għal titjib fil-prestazzjoni tal-impjegati.

X'opportunitajiet ta' karriera hemm fis-Servizz Pubbliku?

Il-postijiet vakanti fis-Servizz Pubbliku jimtlew b'żewġ modi: internament jew esternament. Il-postijiet vakanti interni jimtlew permezz ta' Ċirkulari P&SD miftuħa għall-uffiċjali pubbliċi li jaqdu, filwaqt li l-postijiet vakanti esterni jiġu reklamati fil-Gazzetta tal-Gvern. Iċ-Ċirkulari P&SD kollha jistgħu jidhru fuq dan is-sit elettroniku, filwaqt li s-sejħiet esterni jistgħu jidhru fuq is-sit elettroniku tad-Dipartiment tal-Informazzjoni.

Kif tiġi applikata d-dixxiplina fis-servizz pubbliku?
Id-dixxiplina fis-servizz pubbliku hija applikata skont ir-Regolamenti tal-Kummissjoni tas-Servizz Pubbliku (Proċedura Dixxiplinarja) (Avviż Legali 186/1999).

Jekk niffaċċja akkuża dixxiplinarja x'inhuma d-drittijiet tiegħi?

Minbarra d-dritt ta' tweġiba f'diversi stadji tal-proċess, uffiċjali pubbliċi li huma akkużati b'reat dixxiplinarju għandhom id-dritt li, fost affarijiet oħra:

(a) ikunu jafu l-każ kollu kontrihom
(b) jagħmlu d-difiża tagħhom stess
(c) jaċċessaw l-evidenza dokumentarja kollha
(d) ikunu assistiti minn persuna tal-għażla tagħhom
(e) dritt li jkunu jafu dwar kwalunkwe deċiżjoni fi żmien 20 jum ta' xogħol

Hemm xi kundizzjonijiet li nista' nibbenefika minnhom jekk ikolli tifel/tifla?

Iva. L-impjegati pubbliċi nisa jistgħu jieħdu vantaġġ mil-liv tal-maternità mħallas qabel it-twelid u immedjatament wara t-twelid. L-uffiċjali pubbliċi kollha huma intitolati għal-liv tal-ġenituri mhux imħallas u jistgħu jitħallew jaħdmu fuq skeda ta' sigħat imnaqqsa sabiex jieħdu ħsieb tfal taħt it-12-il sena.
L-uffiċjali pubbliċi jistgħu wkoll jieħdu vantaġġ mil-liv tal-adozzjoni f'każ li jagħżlu li jadottaw.

Irrid nieħu ħsieb it-tifel/tifla tiegħi li għandu/għandha diżabilità. Hemm xi kundizzjoni li nista' nibbenefika minnha?

Iva. Ġenituri li huma uffiċjali pubbliċi jistgħu jingħataw liv ta' responsabbiltà jew jaħdmu fuq skeda tax-xogħol imnaqqsa sabiex ikollhom ħin biex jieħdu ħsieb it-tifel/tifla tagħhom b'diżabilità.

Għandi ġenitur anzjan li jeħtieġ il-kura tiegħi. Hemm xi kundizzjoni li nista' nibbenefika minnha?

Iva. Anke dawn l-uffiċjali jistgħu jibbenefikaw minn liv ta' responsabbiltà jew permess biex jaħdmu fuq skeda tax-xogħol imnaqqsa.

Mistoqsijiet Frekwenti dwar il-kundizzjonijiet rigward Liv Speċjali Mhux Imħallas mhux fuq Raġunijiet ta' Politika Pubblika/ Fuq Raġunijiet ta' Politika Pubblika biex Taħdem mal-Istituzzjonijiet, Korpi u Aġenziji tal-Unjoni Ewropea u Organizzazzjonijiet Internazzjonali (Għad-definizzjoni tat-terminu 'fuq raġunijiet ta' politika pubblika' jekk jogħġbok irreferi għall-Glossarju tat-Termini Organizzattivi u ta' Ġestjoni billi tikklikkja hawn).

6. F’liema ċirkostanzi ningħata leave speċjali mingħajr ħlas mhux għal raġunijiet ta’ politika pubblika?

Leave speċjali mingħajr ħlas MHUX għal raġunijiet ta’ politika pubblika jingħata meta tintgħażel għal postijiet taħt AD9 fi ħdan Istituzzjonijiet, Korpi u Aġenziji tal-Unjoni Ewropea.

7. Taħt liema kundizzjonijiet jingħata l-leave mingħajr ħlas mhux għal raġunijiet ta’ politika pubblika?

L-eliġibbiltà għal dan ta’ hawn fuq hija li l-uffiċjali pubbliċi jkunu ilhom fis-Servizz Pubbliku għal tal-inqas tnax-il xahar.

Il-perjodu ta’ żmien tal-leave mingħajr ħlas: għal perjodu massimu ta’ tliet snin jew it-tul tas-servizz tiegħek, skont liema huwa l-iqsar perjodu.

Kundizzjonijiet għall-għoti ta’ leave mingħajr ħlas: Sakemm tirrispetta l-kundizzjonijiet u l-limitazzjonijiet tal-għoti ta’ tali leave speċjali mingħajr ħlas, int se:
[I] Tgawdi d-dritt li tirritorna għall-grad sostantiv tiegħek li kellek immedjatament qabel l-ingaġġ tiegħek mal-EU;

[ii] Iżżomm id-drittijiet u l-privileġġi kollha applikabbli għall-uffiċċju pubbliku tiegħek u dawk li jirriżultaw mill-Ftehim ta’ Klassifikazzjoni rispettiv;

[iii] Id-drittijiet tas-sigurtà soċjali miksuba taħt l-Att dwar is-Sigurtà Soċjali (Kap. 318) se jiġu ssalvagwardjati skont id-dispożizzjonijiet tar-Regolament tal-Kunsill (KE) Nru 1408/71.

8. Meta napplika għal leave speċjali mingħajr ħlas MHUX għal raġunijiet ta’ politika pubblika?

Ladarba tirċievi konferma tal-impjieg tiegħek mal-Istituzzjoni, il-Korp jew l-Aġenzija tal-EU, għandek tikseb l-approvazzjoni tas-Segretarju Permanenti tiegħek. 

9. Jeħtieġ navża lid-dipartiment tiegħi jekk ningħata leave speċjali mingħajr ħlas MHUX għal raġunijiet ta’ politika pubblika?

Irid jiġi osservat perjodu ta’ avviż ta’ tliet xhur, sakemm jekk int tokkupa pożizzjoni li teħtieġ perjodu ta' avviż itwal, sew kuntrattwali jew xort’oħra, il-perjodu ta’ avviż kuntrattwali itwal jipprevala.

10. Kemm-il darba nista’ napplika għal leave speċjali mingħajr ħlas mhux għal raġunijiet ta’ politika pubblika?

Leave speċjali mingħajr ħlas mhux għal raġunijiet ta’ politika pubblika għal impjieg mal-Istituzzjonijiet, il-Korpi jew l-Aġenziji tal-EU jista’ jintuża darba biss, irrispettivament mit-tul ta’ żmien li, fi kwalunkwe każ, qatt ma jista’ jaqbeż il-perjodu massimu ta’ 3 snin.

11. Nista’ ningħata estensjoni tal-leave mingħajr ħlas mhux għal raġunijiet ta’ politika pubblika?

Talbiet għal estensjoni tal-perjodu tal-leave mingħajr ħlas għal impjieg mal-istess Istituzzjoni għandu mnejn jiġi kkunsidrat sakemm il-limitu ta’ tliet snin ma jinqabiżx.

12. X’jiġri jekk nirriżenja mill-post tiegħi mal-Istituzzjoni, il-Korp jew l-Aġenzija tal-EU, jew il-post tiegħi jiġi tterminat qabel l-iskadenza tal-perjodu kuntrattwali u/jew il-perjodu approvat tal-leave mingħajr ħlas?

Jekk tirriżenja jew l-impjieg tiegħek mal-Istituzzjoni, il-Korp jew l-Aġenzija Ewropea jiġi tterminat qabel l-iskadenza tal-perjodu kuntrattwali u/jew il-perjodu approvat tal-leave mingħajr ħlas, int tkun meħtieġ tikteb immedjatament lill-P&SD, fejn titlob it-tkomplija tad-dmirijiet mal-Gvern u t-terminazzjoni tal-leave mingħajr ħlas tiegħek.

13. X’inhuma l-konsegwenzi jekk nonqos li ninforma lill-P&SD dwar ir-riżenja tiegħi jew it-terminazzjoni tal-impjieg mal-Istituzzjoni / Korp/ Aġenzija tal-EU?

Jekk tonqos milli tinforma lill-P&SD fi żmien 30 jum dwar ir-riżenja jew it-terminazzjoni tal-impjieg mal-Istituzzjoni, il-Korp jew l-Aġenzija tal-EU, jitqies bħala riżenja mis-Servizz Pubbliku.

14. Kif nista’ nerġa’ nibda d-dmirijiet tiegħi (integrazzjoni mill-ġdid) fis-servizz tal-Gvern wara li nkun użajt il-leave mingħajr ħlas?

Bħala Uffiċjal Pubbliku li użajt il-leave speċjali mingħajr ħlas mhux għal raġunijiet ta’ politika pubblika, tal-inqas 30 jum qabel l-iskadenza tal-leave, għandek tavża lill-P&SD bid-data ta’ meta biħsiebek terġa’ tibda d-dmirijiet mal-Gvern. Il-perjodu ta’ 30 jum għandu jiġi estiż bi 30 jum addizzjonali għal kull sena ta’ leave mingħajr ħlas użat.

15. Jekk jinbidlu ċ-ċirkostanzi, il-leave speċjali mingħajr ħlas tiegħi MHUX għal raġunijiet ta’ politika pubblika jista’ jitqies bħala leave speċjali għal raġunijiet ta’ politika pubblika?

F’każ ta’ bidliet ċirkostanzjali, leave speċjali mingħajr ħlas mhux għal raġunijiet ta’ politika pubblika jista’ jiġi segwit minn leave mingħajr ħlas għal raġunijiet ta’ politika pubblika, sakemm tiġi sottomessa applikazzjoni ġdida. F’dan il-każ, il-perjodu ta' avviż ta’ sitt xhur li jkun meħtieġ normalment għall-għoti ta’ leave speċjali mingħajr ħlas għal raġunijiet ta’ politika pubblika, ma jkunx meħtieġ.

16. F’liema ċirkostanzi ningħata leave speċjali mingħajr ħlas għal raġunijiet ta’ politika pubblika?

Jekk intgħażilt għal wieħed mill-postijiet fil-livelli elenkati f’(1), (2) u (3) hawn taħt u soġġett li jkollok 12-il xahar ta’ servizz mas-Servizz Pubbliku, int tingħata leave speċjali mingħajr ħlas għal raġunijiet ta’ politika pubblika.

(1) Pożizzjonijiet fil-Kabinett jew pożizzjonijiet ta’ fiduċja simili mal-Kummissarji, l-Imħallfin (il-Qorti Ewropea tal-Ġustizzja u l-Qorti tal-Ewwel Istanza), membri tal-Qorti tal-Awdituri, President tal-Parlament, President tal-Kunsill Ewropew, membri tal-Kunsill, President tal-Kumitat Ekonomiku u Soċjali Ewropew u l-President tal-Kumitat tar-Reġjuni;

(2) Jekk il-post mal-Istituzzjoni, il-Korp jew l-Aġenzija tal-EU huwa fil-kategorija A16, A15, A14, A13;

(3) Jekk il-post mal-Istituzzjoni, il-Korp jew l-Aġenzija tal-EU huwa fil-kategorija A12, A11, A10, A9.

Tul ta’ żmien: Se japplikaw il-perjodi li ġejjin għal leave mingħajr ħlas tiegħi għal raġunijiet ta’ politika pubblika għall-kategoriji ddefiniti hawn fuq hekk kif ġej:

(1) Perjodu massimu ta’ ħames (5) snin li jista’ jiġġedded biex tittieħed pożizzjoni ta’ fiduċja ġdida ma’ Kummissarju, Imħallef jew President differenti tal-Istituzzjonijiet imsemmija hawn fuq;

(2) Perjodu massimu ekwivalenti għat-tul ta’ żmien tat-termini tal-kariga tal-postijiet li għandek;

(3) Perjodu massimu ta’ ħames (5) snin sakemm, jekk ilek fis-servizz pubbliku għal aktar minn għaxar (10) snin, il-perjodu massimu jista’ jiġi estiż sa għaxar (10) snin, limitat madankollu għat-tul ta’ żmien tat-termini tal-kariga tal-postijiet li għandek, skont liema huwa l-iqsar.

17. Liema kundizzjonijiet huma garantiti meta jingħata leave mingħajr ħlas għal raġunijiet ta’ politika pubblika?

Sakemm tirrispetta l-kundizzjonijiet u l-limitazzjonijiet tal-għoti ta’ tali leave speċjali mingħajr ħlas, int se:

[i] Tgawdi d-dritt li tmur lura għall-grad sostantiv tiegħek fis-servizz pubbliku;

[ii] Tkun eliġibbli għal progressjoni jew promozzjoni fl-istess klassifikazzjoni;

[iii] Iżżomm id-drittijiet u l-privileġġi kollha applikabbli għall-uffiċċju pubbliku tiegħek u dawk li jirriżultaw mill-Ftehim ta’ Klassifikazzjoni rispettiv;

[iv] Is-servizz tiegħek mal-EUjiġi magħdud bħala servizz mal-Gvern, anke għal finijiet ta’ pensjoni;

[v] Jekk int uffiċjal intitolat għal pensjoni, is-servizz tiegħek mal-EU jiġi meqjus bħala servizz mogħti lill-Gvern ta’ Malta għal finijiet ta’ pensjoni taħt l-Ordinanza dwar il-Pensjonijiet;

[vi] Drittijiet tas-sigurtà soċjali miksuba f’Malta taħt l-Att dwar is-Sigurtà Soċjali (Kap. 318) qabel l-impjieg tal-uffiċjal mal-Istituzzjoni, il-Korp jew l-Aġenzija tal-EUse jiġu ssalvagwardjati skont id-dispożizzjonijiet tar-Regolament (KE) Nru 883/2004. 

18. Meta napplika għal leave speċjali mingħajr ħlas għal raġunijiet ta’ politika pubblika?

Ladarba tirċievi konferma tal-impjieg tiegħek mal-Istituzzjoni, il-Korp jew l-Aġenzija tal-EU, għandek tikseb l-approvazzjoni tas-Segretarju Permanenti tiegħek qabel ma tapplika mal-P&SD għal-leave speċjali mingħajr ħlas għal raġunijiet ta’ politika pubblika.

19. Jeħtieġ navża lid-dipartiment tiegħi jekk ningħata leave speċjali mingħajr ħlas għal raġunijiet ta’ politika pubblika?

Irid jiġi osservat perjodu ta’ avviż ta’ sitt xhur, sakemm jekk int tokkupa pożizzjoni li teħtieġ perjodu ta' avviż itwal, sew kuntrattwali jew xort’oħra, il-perjodu ta’ avviż kuntrattwali itwal jipprevala.

20.Nista' ningħata estensjoni tal-leave bla ħlas tiegħi minħabba raġunijiet ta' politika pubblika?

Talbiet għal estensjoni tal-liv bla ħlas ta' 5 snin mogħti lil impjegati li għandhom karigi ta' fiduċja ma' Kummissarji, Imħallfin jew Presidenti ta' Istituzzjonijiet tal-Unjoni Ewropea, jistgħu jiġu kkunsidrati biex jibdew impjieg ma' Kummissarju, Imħallef jew President tal-Istituzzjonijiet differenti.

21. X’jiġri jekk nirriżenja mill-post tiegħi mal-Istituzzjoni, il-Korp jew l-Aġenzija tal-EU, jew il-post tiegħi jiġi tterminat qabel l-iskadenza tal-perjodu kuntrattwali u/jew il-perjodu approvat tal-leave mingħajr ħlas?

Jekk tirriżenja jew l-impjieg tiegħek mal-Istituzzjoni, Korp jew Aġenzija Ewropea jiġi terminat qabel l-iskadenza tal-perjodu kuntrattwali u/jew il-perjodu approvat ta' leave mingħajr ħlas, int mitlub tikteb immedjatament lill-P&SD biex titlob li terġa' tibda dmirijietek mal-Gvern u li l-leave mingħajr ħlas tiegħek jintemm.

22. Meta għandi nfittex it-tkomplija tad-dmirijiet (integrazzjoni mill-ġdid) fis-servizz pubbliku?

It-tkomplija tad-dmirijiet mas-Servizz Pubbliku trid tintalab bil-miktub lill-P&SD, mill-inqas 12-il xahar qabel l-iskadenza tal-leave speċjali mingħajr ħlas tiegħek.

23. Jekk niġi nnominat biex inkun sekondat bħala Espert Nazzjonali, id-dispożizzjonijiet ta’ hawn fuq japplikaw?

Id-dispożizzjonijiet ta’ hawn fuq ma japplikawx għal Esperti Nazzjonali billi huma sekondati mal-Istituzzjonijiet, il-Korpi u l-Aġenziji tal-Unjoni Ewropea. Tali sekondar, li jista’ jkun għal perjodi sa mhux aktar minn erba’ snin, isir mill-Gvern b’rispons għal talba jew sejħa formali maħruġa lill-Istati Membri minn Istituzzjoni, Korp jew Aġenzija tal-EU. Bħala regola ġenerali, is-salarji ta’ tali uffiċjali sekondati jibqgħu jitħallsu mid-dipartiment tagħhom f’Malta u l-entità tal-EU tħallas l-allowances tal-għajxien u l-ivvjaġġar.

1. Bħala Uffiċjal Pubbliku, jekk nintgħażel għal impjieg ma’ istituzzjoni internazzjonali, ikolli nirriżenja?

Bħala Uffiċjal Pubbliku, għandu mnejn tingħata leave speċjali mingħajr ħlas biex tibda impjieg ma’ organizzazzjonijiet internazzjonali, bħall-Organizzazzjoni Dinjija tas-Saħħa (WHO), in-Nazzjonijiet Uniti (UN), l-Organizzazzjoni tal-Ikel u l-Agrikoltura (FAO) u l-Commonwealth.

2. Kif nista’ napplika għal leave mingħajr ħlas biex naħdem ma’ organizzazzjoni internazzjonali?

L-applikanti jistgħu japplikaw billi jissottomettu l-formola elettronika rispettiva lis-Segretarju Permanenti rispettiv, permezz tad-Direttur/Kap tad-Dipartiment tagħhom, inkluża d-dokumentazzjoni neċessarja, il-perjodu tal-assenjazzjonijiet tax-xogħol u d-deskrizzjoni tal-pożizzjoni. ​

3. Taħt liema termini u kundizzjonijiet jingħata dan il-leave mingħajr ħlas?

Leave mingħajr ħlas għal xogħol ma’ organizzazzjonijiet internazzjonali jingħata lil uffiċjali pubbliċi li kkompletaw tal-inqas servizz sena (1) u huma magħżula biex jaħdmu ma’ organizzazzjoni internazzjonali.

4. Nista’ nitlob estensjoni tal-leave mingħajr ħlas mogħti?

Mal-iskadenza tal-ewwel 12-il xahar ta’ leave mingħajr ħlas, tista’ titlob tiġdid. Leave mingħajr ħlas jista’ jiġġedded annwalment, sa massimu ta’ tmien (8) snin, skont l-esiġenzi tas-servizz.

5. X’jiġri jekk nirriżenja mill-post li nokkupa mal-organizzazzjoni internazzjonali jew l-ingaġġ jiġi tterminat?

Fil-każ ta’ riżenja jew terminazzjoni tal-impjieg mill-Organizzazzjoni Internazzjonali, għandek tavża lill-P&SD u lid-Dipartiment/Direttorat li jimpjegak bid-data eżatta ta’ meta biħsiebek terġa’ tibda d-dmirijiet tiegħek.